Rwanda imeanza mchakato wa kuanzisha Kitambulisho Kipya cha Kidijitali cha Biometria, mradi mkubwa wa mageuzi ya kidijitali unaolenga kutoa huduma salama, rahisi na jumuishi. Mradi huu unafadhiliwa kwa zaidi ya euro milioni 50 kupitia Benki ya Dunia na Benki ya Miundombinu ya Asia, na utatumia alama za kibayometria kama sura, alama za vidole na skani za macho (iris) ili kurahisisha uthibitisho wa utambulisho mtandaoni.

Mfumo huu mpya ni jumuishi zaidi kwa kuwa utatolewa kuanzia kuzaliwa na utawahusu pia wakimbizi, watu wasio na utaifa na wakazi wa muda mrefu (permanent resident). Serikali pia imeweka msisitizo mkubwa kwenye faragha, ambapo wananchi wataweza kuchagua ni taarifa gani wanazotaka kutoa kwa watoa huduma kulingana na aina ya huduma wanayotafuta.

Mamlaka ya Vitambulisho Vya Taifa (NIDA) ya Rwanda imefafanua kuwa kitambulisho hiki si chombo cha ufuatiliaji bali ni maboresho ya mifumo iliyopo, kikifuata mifano bora ya kimataifa kutoka nchi kama Estonia, Singapore, Kenya, Ethiopia na Nigeria. Utekelezaji umeanza kupitia majaribio katika baadhi ya wilaya, huku ukusanyaji wa taarifa nchi nzima ukitarajiwa kukamilika Juni 2026.

Raia wote, wakiwemo wanaoishi nje ya nchi, wanahimizwa kuanza kujisajili kupitia mtandao wa Irembo. Kitambulisho hiki kipya kinatarajiwa kubadilisha jinsi wananchi wanavyopata huduma, na kuchochea mustakabali salama na wenye muunganiko mkubwa wa kidijitali kwa Rwanda.