Jioni ya tarehe 28, Oktoba 2023, Mheshimiwa Balozi wa Rwanda nchini Tanzania, Fatou Harerimana, aliwakaribisha wanachama wa Jumuiya ya Wanyarwanda waishio jijini Dar es salaam (RCA-Dar es Salaam) katika bustani iliyopo katika ubalozi, na kujumuika pamoja na kufahamiana zaidi.

Ilikuwa ni jioni nzuri iliyopambwa na fursa murua ya kuzungumza kwa pamoja juu ya mambo mbalimbali yanayowahusu kama jumuiya, familia, na taifa la Rwanda, kwa dhamira ya kuimarisha umoja, mshikamano, kusonga mbele na kutengeneza simulizi mpya za mafanikio (UBUMWE N'UBUDAHERANWA)

Mheshimiwa Balozi aliwasihi jumuiya kuzidi kupendana siku zote. Alisema katika hali yoyote ile migawanyiko isipewe nafasi, bali kushirikiana katika raha na shida, na kufunguliana milango ya mafaniko katika shughuli mbalimbali za kiuchumi na kijamii.

Wakati huo huo, Mhe. Balozi Fatou, aliwakumbusha wana jumuiya kuzidi kuwalea watoto wao katika maaadili ya Kinyarwanda. Alisema inahitajika umakini mkubwa wa kuwalinda watoto na kuwalea vyema katika nyakati hizi za utandawazi na maendeleo ya teknolojia ya mawasiliano.